सावकी (लो) हे गाव गिरणा नदीच्या काठावर असलेले असून देवळा तालुक्यात आहे. पुर्वीच्या काळी हे गाव' लोहणैर परगण्यातील असून येथे जहाँगीर रहात होते. त्यांचा भव्य पडका वाडा आजही साक्ष देत ऊभा आहे. तसेच त्या काळी एक सावकार आपला व्यवसाय करीत असे. सावकारी या शब्दावरून सावकी हे नाव पडले असावे. तसेच लोहणेर परगण्यातील असल्याने कंसात (लो) हा शब्द आहे. या गावी मुख्य धंदा शेतीचा असल्याने पुर्वीच्या उदार सावकाराने गिरणा नदिवर भव्य बंधारा बांधुन शेतासाठी आज बागायत १५० एकर जमिन सिंचनाखाली आहे. ऊसाचे पिक मुबलक असल्याने गुन्हाळ्यातून उत्तम प्रतीचा गुळ तयार करण्यात प्रसिद्ध होते. येथे लघुउद्योग म्हणून बैलगाडी शेतीची अवजारे तयार केली जातात. गावात ग्रामपंचायत, पतसंस्था, जि. प. पूर्ण प्राथमिक शाळा, माध्यमिक शाळा, अंगणवाडी, प्राथमिक आरोग्य केंद्र, पोस्ट' ऑफीस, तलाठी कार्यालय तसेच महिला व भजनी मंडळ आहे. शिवाय गावात हनुमान मंदिर, राममंदिर, मशिद, स्वामी समर्थ केंद्र इ. विविध देवालये आहेत. एक गाव एक पाणवठा असल्याने हिन्दु - मुस्लीम भाई-भाई' याप्रमाणे सर्व धर्मातील, जातीतील लॊक बंधुभावाप्रमाणे राहतात, असा हा आमचा गाव आहे.